Eusko Legebiltzarreko osoko bilkuran, beste behin ere, eskola-jantokien oraina eta etorkizuna aztertu ziren. GPGA gonbidatu gisa joan zen eta gai honetan dagoen blokeo orokorraren lekuko izan ginen. Jokin Bildarratz Hezkuntza sailburuari galdetu zitzaion eskola-jantokien egungo egoerari buruz, bai lizitazioen esparruan, bai sukalde berrien eraikuntzen egoeran, bai etorkizuneko kudeaketa-ereduan eta araudiaren aldaketan. Bere erantzunak etengabeko ihesa baino ez ziren izan, inolako xehetasunik edo argibiderik eman gabe. Beste behin ere egiaztatu da Eusko Jaurlaritza erabat blokeatuta dagoela gai honekin. Lizitazio berriak blokeatuta daude oraindik hainbat errekurtsoren ondorioz, ez dago aurrerapausorik sukalde berrien eraikuntzan, eta kudeaketa osagarriaren eredu berriari dagokionez, erabateko zehaztasunik eta borondate politikorik eza dago, nahiz eta gai honetan egindako aurrerapenak etengabe adierazi.
Azken hilabeteotan, Hezkuntza Saileko arduradunek behin baino gehiagotan aipatu dute erakunde arteko lanaren aukera eskola-jantokiaren eredu deszentralizatuago baterantz aurrera egiteko, tokiko produktuekin eta menuetan jasangarriekin. Bide hori gutxi edo batere ez da garatu, eta, horregatik, nahiz eta zenbait udalek interesa agertu duten kogestio deszentralizatuaren bide hori garatzeko, Eusko Jaurlaritzaren borondate eskasak blokeatu egiten ditu toki-erakundeek egin ditzaketen urrats posible guztiak.
Bestalde, joan den ostiraleko osoko bilkuran, Gasteizko Udalak proposamen bat egin zuen, eskoletan sukaldeak instalatzeko azterketa bat egiteko eta 2019ko urriaren 24ko Legebiltzarreko erabakia betetzeko eskatuz. Nahiz eta alderdi guztiek agertu eskola-elikadura osasuntsuago eta iraunkorrago baten aldeko urratsak emateko interesa, mozioak ez zuen aurrera ateratzeko beharrezko babesik izan.
Ezezkoaren alde agertu ziren alderdiek aipatu zuten Eusko Jaurlaritzak ez duela oraindik biderik erakutsi tokiko erakundeak inplikatu ahal izateko. Gainerako alderdiek (positibotzat jo zutenek) arrazoi hori bera aipatu zuten urratsak ematen hasteko, Hezkuntza Sailaren blokeoa ez baita aitzakia gisa erabili behar ezerk aurrera egin ez dezan.
Gure Platera Gure Aukera taldeko bi kidek hartu zuten parte herri txandan, eta bertan azaldu zituzten erakunde guztietara urteetan hurbildu ditugun proposamen guztiak.
Laburbilduz, gutxi edo batere ez da aurreratu 2019an hartutako konpromisoetan. Eusko Jaurlaritzaren blokeo eta erabaki eskasaren ondorioz, denak geldirik jarraitzen du, eta asko dira hori guztia desblokeatu arte itxaroten ari diren gizarte-, hezkuntza- eta toki-eragileak, tokian tokiko eskola-elikadura osasungarriagoa, iraunkorragoa, bidezkoagoa eta hezitzaileagoa eraikitzeko.
Horregatik, Gure Platera Gure Aukerak egungo egoera desblokeatzeko eskatzen du, erakundeen arteko lan-mekanismoak aktibatuz eta gizarte- eta hezkuntza-eragileen proposamenak eta ideiak bilduz.
