Egun indarrean dagoen kontratua 2022an esleitu zen, hasiera batean hiru urteko iraupenarekin; beraz, 2026ko ekainean amaituko da, luzapenak egiteko aukera aurreikusten duen arren. Egoera honen aurrean, familiek uste dute une garrantzitsua dela eskola-jantokiaren eredua berrikusteko.

Plataformatik adierazi dute ikastetxeetan sukaldeak in situ jartzeak berehalako ezarpena eragozten duten inbertsioak eta gauzatze-epeak behar dituela; horregatik, aurreikus daitekeenez, trantsiziozko sukalde zentraleko eredu bat lizitatu beharko da berriro. Testuinguru horretan, Plataformak  Eusko Jaurlaritzari eskatzen dio etorkizuneko kontratazioak ez ditzala egungo kontratuan hautemandako arazo berberak errepikatu.

Plataformak egindako azterketak gabezi nabarmenak identifikatu ditu egungo kontratuko pleguen idazkeran. Horiek, eskola-elikadura eredu osasuntsu eta jasangarria bermatu beharrean, ekoizpen-sistema industrializatua eta erabat zentralizatua bultzatzen dute de facto.

Elementu deigarrienetako bat eskola-menurako finkatutako gehieneko prezioa da: 2,95 €. Kopuru horrek lehengaien kostua, prestaketa, langileak, sukalde zentraletik egindako garraioa, administrazio-gastuak eta enpresa-etekina estali behar ditu aldi berean. Prezio hori, gainera, kontratuak irauten duen bitartean (bost urte arte luzatu daiteke) berrikusteko inolako mekanismorik gabe ezartzen da. Elikagaien prezioen lurrunkortasun handiko testuinguru honetan, berrikuspenik ez egoteak kostuak murrizteko egiturazko presioa dakar, eta horrek, ezinbestean, erabilitako lehengaien kalitateari eragiten dio.

Muga ekonomiko horri zehaztapen teknikoen idazkera gehitu behar zaio, nutrizio-eskakizunetan dagoen zehaztasun falta nabarmenagatik. Pleguak behin eta berriz erabiltzen ditu “lehentasunez” edo “ahal den neurrian” bezalako adierazpenak, eta formula horiek nabarmen apaltzen dute elikadura-estandarren derrigorrezko izaera. Adibidez, arrain freskoaren erabilera “ahal den neurrian” planteatzen da, hilean behin gutxienez; horri esker, zerbitzatzen den gainerako arraina izoztua edo prozesatua izan daiteke kontratua hautsi gabe.

Antzeko zerbait gertatzen da oinarrizko elikagaiekin, hala nola haragiarekin eta barazkiekin. Pleguak ezartzen du haragiak “lehentasunez freskoak” izango direla, baina ez du gutxieneko ehunekorik finkatzen, ezta haragi izoztua edo haragi-produktu prozesatuak erabiltzeko muga argirik jartzen ere. Barazkien kasuan, “ahal den neurrian sasoiko barazki freskoak” erabiliko direla adierazten da, baina formulazio horrek ez du maiztasunari edo produktuaren proportzioari buruzko betebehar egiaztagarririk ezartzen. Praktikan, adierazpen horiek interpretazio-marjina zabala uzten diote enpresa esleipendunari erabilitako osagaien benetako kalitateari buruz.

Gainera, menuen plangintzak berak gantz-eduki handiko prestaketen edo lagungarri ez-osasungarrien presentzia nahiko handia ahalbidetzen du. Pleguak astean bi plater arrautzaztatu eta astean bi frijitu onartzen ditu, sukaldeko teknika horien muga bateraturik ezarri gabe. Era berean, astean behin patata frijituak egotea onartzen da, ketchupa astean bitan eta maionesa hilean bitan, lagungarri horietan gehieneko nutrizio-profilik edo gatza edo gantza neurtzeko muga argirik ezarri gabe.

Esleipen-irizpideek ere ez dituzte gabezia horiek zuzentzen. Pleguak 100etik 52 puntu ematen ditu ziurtatutako produktu batzuk (ekologikoak, bidezko merkataritzakoak edo kalitate-izendapenak) sartzeagatik, baina puntuazioa hitzemandako produktu indibidual bakoitzeko ematen da, erabilitako lehengai guztien gaineko gutxieneko ehunekorik edo benetako kontsumo-bolumenik eskatu gabe. Horrek esan nahi du enpresa batek puntuazio altua lor dezakeela ziurtatutako produktu batzuk puntualki sartuta, menuaren zati handiena ohiko kate industrialen bidez hornitzen jarraitzen duen bitartean.

Horri kontratuaren dimentsio ekonomikoa gehitu behar zaio: balioetsitako balioa 76 milioi eurotik gorakoa da Araban, eta 66,6 milioi inguru Gasteizi dagokion lote bakarrean biltzen dira. Eskala horrek gaitasun handiko azpiegitura industrialak eskatzen ditu —bolumen handiko sukalde zentralak, logistika-sare konplexuak eta finantza-kaudimen handia—, eta horrek asko zailtzen du nekazaritzako elikagaien enpresa txiki eta ertainek lizitatzaile nagusi gisa parte hartzea, nahiz eta kontratazio publikoaren legediak loteetan banatzea sustatzen duen, hain zuzen ere, horien sarbidea errazteko.

Pleguak ez du muga operatibo argirik ezartzen logistika-ereduaren funtsezko alderdietan ere. Ez da garraiorako gehieneko distantziarik ezartzen, ezta sukaldatzearen eta kontsumoaren arteko gehieneko denborarik ere. Horri esker, elikagaiak ikastetxetik dozenaka kilometrora dauden sukaldeetan prestatu daitezke eta garraioan denbora luzez egon daitezke kontratua formalki urratu gabe. Gaur egun, 8.700 eskola-menuk 70 kilometro inguru egiten dituzte egunero Derion dagoen sukalde zentraletik Gasteizko eskola-jantokietaraino.

Egoera horri jantoki-orduko zerbitzuaren antolamendu-eredua gehitu behar zaio. Autonomia-araudiak ezarritako monitore-ratioek, berriki hobetu diren arren, ikasle talde jendetsuak esleitzen dizkiote monitore bakoitzari; gainera, monitorizaziorako aurreikusitako zereginak zainketa, antolaketa eta garbiketa lanetara mugatzen dira. Diseinu horrek eragotzi egiten du eskola-jantokiak benetako hezkuntza-lana garatu ahal izatea, nahiz eta hezkuntza-araudiak gune hori ikastetxearen proiektu pedagogikoaren partetzat hartzen duen. Plataformaren arabera, azterketak agerian uzten du kontratuaren diseinuak berak lehenesten dituela eraginkortasun logistikoa eta kostuen murrizketa, zerbitzua catering industrialeko sistema handien bidez ematea ahalbidetuz, ikasleei ematen zaien menuaren benetako kalitatea bermatu gabe.

Gasteizko familien ustez, kontratua arautzen duten baldintza-pleguak idazteko prozesua aukera bat da irizpide argiagoak eta zorrotzagoak sartzeko, eskola-elikadura osasuntsua, jasangarria eta eskola-jantokiaren hezkuntza-funtzioarekin koherentea izango dela bermatzeko.

*Irakurri txosten osoa.

• Deszentralizazioaren zergatiak.
• Heldu-leku juridikoak.
• Aukera egingarriak.

Deszentralizazioa hasteko, helduleku garrantzitsua dugu EAEn: eskola-jangelen egungo ereduak behar dituen aldaketei buruz 2019an Legebiltzarrak aho batez onartu zuen erdibideko zuzenketa eta zehazki, puntu hauek:

• Kudeaketa berritzailea eta deszentralizatua hautatzen duten ikastetxeei aukera bideragarriak eman behar zaizkie.
• Eskola-jangelen kudeaketa deszentralizatuaren zenbait eredu azter ditzala Eusko Jaurlaritzak helburu izanik eskola-jangelen ikastetxeek berek eta/edo tokiko erakundeekin lankidetzan kudeatzea.

Saioa 17,30etan hasiko da. Ordu eta erdiko iraupena izango du eta ezinbestekoa da izena ematea lotura honetan.

Gure platera, gure aukeraren jangela-eredua

GPGAren hitz-hartzearekin hasi zen jardunaldia. Eskola–jangela osasungarria, agroekologikoa, gertukoa, parte-hartzailea eta ekonomikoki iraunkorra aldarrikatzen du Gure platera, gure aukerak. Ezaugarri hauek izan behar ditu eskola-jangela eredu horrek:

• Hezkuntza komunitateari dagokio zein jangela-eredu nahi duen erabakitzea.
• Jantokia ikastetxearen hezkuntza – proiektuaren parte izan behar da eta hezkuntza publikoaz ari garen heinean, bertako langileak publikoak izan behar dira.
• Ahal den ikastetxe guztietan bertan sukaldatzen dela bermatu behar da. Sukaldea bertan eraikitzeko aukerarik ez dagoen kasuetan, bestelako aukerak aztertuko dira, azpiegiturak partekatzea, esaterako.
• Eskola-jantokiaren kudeaketa osagarriak kudeaketa-aukera edo eredu desberdinak jaso behar ditu, ahalik eta proiektu gehienek tokia izan dezaten.

Deszentralizazioa nola egin? Eskola-jantokitik eskola-jangelara

Ondoren, Aitor Bilbao abokatuak hartu zuen hitza. Hasteko, EAEn eskola-jantokiei dagokien araudia aztertu zuen (17/2023 Hezkuntza Legea, 2024ko irailaren 9ko agindua). Indarrean dagoen aginduak sektoreko enpresen bidezko kudeaketa  ahalbidetzen du soilik eta bestekoa kudeaketak ahalbidetzen dituen dekretu berri bat egin beharko litzatekeela azaldu zuen.

Ondoren, EAEko Araudia Nafarroakoa eta Kataluniakoarekin alderatu zituen. Nafarroako 58/2024 dekretuak, esaterako, aukera ematen du eskola-jangela kudeatu nahi duten tokiko erakundeekin hitzarmenak egiteko.  Bestalde, Kataluniako araudiak hainbat kudeaketa-eredu ahalbidetzen ditu:

• Sektoreko enpresa bati zerbitzua emanez
• Sektoreko enpresekin kanpoan prestatutako janaria.
• Udalekin edo eskualdeko kontseiluekin egindako hitzarmenen bidez.
• Ikastetxeen kudeaketa zuzena.
• Herritarrei irekita dauden bestelako establezimendu, erakunde edo instituzioekin egindako hitzarmenen bidez.

Deszentralizazioa hasteko, helduleku garrantzitsua dugu EAEn: eskola-jantokien egungo ereduak behar dituen aldaketei buruz 2019an Legebiltzarrak aho batez onartu zuen erdibideko zuzenketa. Honek lau puntu ditu:

• Kudeaketa berritzailea eta deszentralizatua hautatzen duten ikastetxeei aukera bideragarriak eman behar zaizkie.
• Sukaldeak eraikitzea bermatuko da hala eskatzen duten ikastetxeetan.
• Eskola-jantokien kudeaketa deszentralizatuaren zenbait eredu azter ditzala Eusko Jaurlaritzak helburu izanik eskola-jantokiak ikastetxeek berek eta/edo tokiko erakundeekin lankidetzan kudeatzea.
• Eusko Jaurlaritzak proposa dezala jantokien araudiaren beste idazketa bat aurretiaz hezkuntza-komunitatea kontsultatuta.

Momentu honetan egunero milaka menu egiten dituzten 8 enpresetan dago zentralizatuta EAEko ikastetxe publikoetako jantokien kudeaketa. Azken lizitazioan jasangarritasunarekin lotutako irizpideak sartu diren arren (elikagai ekologikoak, labeldunak, bidezko merkataritzakoak, bertako ekoizleenak), hobetzeko margen handia dago eta badaude esperientzia interesgarriak, Urduñako udaleko pleguak eta Gasteizko haur-eskoletakoak, esaterako.

Bestalde, Europatik eratorritako araudiek erosketa publikoan gizarte- eta ingurumen-irizpideak sartzera behartzen du.

Udal kudeaketa Betelun

Nerea Martiarena eta Marta Barbak Araitz-Beteluko Araxes eskolako esperientzia azaldu zuten. Albiste honetan azaldu genuen esperientzia hau. 58/2024 dekretu berriak ematen duen aukera aprobetxatuz, jantokiaren udal-kudeaketa abiatu dute bertan. Beraien hitzartzea bi norabidetan egin zuten: batetik, Nafarroako eskola-jantokien testuingurua eta azken urteetan sortu diren aukerak partekatu zituzten. Eta bestetik, eskola jantokiko proiektu hau hasi berria denez, martxan jartzeko prozesu honen ikaspenak eta aurrera begirakoak.

EAEko testuingurua ezberdina den arren, gakoak hauek lirateke: elikadura burujabetzaren aldeko proiektuak errazteko eta garatzeko araudi-markoa, herri mailako tresna eta erakunde propiak sortzea kudeaketarako eta ikastetxeen arteko erosketa partekatuak.

Urduñako esperientzia

Urduñakoa EAEn garatu diren lau proiektu pilotuetako bat da eta 2018an abiatu zen. Urduñako eskolak ez du sukalderik, aldiz, ondoan dagoen zahar etxeak bai. Sukalde berean bi zerbitzuak emateko, udal-sukaldea egin zen zahar-etxean.

Momentu honetan IGEa elikadura partidaz arduratzen da. Hau da:

• Janaria erosteaz: Udalak hornitzaileentzako lizitazio publikoa ateratzen du eta lizitazio horretara atxikitzen da IGEa. Elikagaien %80a ekologikoa da.
• Menuak diseinatzeaz, dietista, udal-teknikaria eta IGEaren artean.
• Dietista kontratatzeaz.
• Sukaldeko alokairua ordaintzeaz.

Lan pedagogiko garrantzitsua egiten du ere IGEak, bai ikasleekin (tailerrak, jokuak eskola-orduetan) eta familiekin (hitzaldiak, tailerrak…). Komunikazio-batzordea dute ere.

Amaitzeko, IGEko ordezkariek marko juridiko bat eskatu zuten beraien esperientziarako.

Jangelen udal-kudeaketa

Jantokiko erabileran beherakada handia nabaritu zutenean, eskolako ordutegi eta jantoki zerbitzuaren ezaugarriengatik (menuen kalitatea eta prezioa, besteak beste), bestelako araudi-marko bat lantzeko interesa piztu zen Leitza aldean eta jantokiaren kudeaketa Hezkuntza departamendutik herri mailara jaisteko aukera lantzen hasi ziren.

Kantabriako eredua oinarri izan zuten lanketa hau abiatzeko. Orain dela bi urte atera zen foru dekretu berria baliatuz, Hezkuntza departamentuarekin hitzarmena egin eta udal-kudeaketa oinarri duen jangela proiektuak garatu dituzte Leitza eta Betelun.

Egungo funtzionamendua

Gaur egun, ordezkaritza publiko-komunitario bat oinarri duen kudeaketa eredu bat dago martxan herri bakoitzean. Leitzan jangela-mahai batek kudeatzen du jangela.  Udalak, irakasleek, familiek langileek eta  Zaindu Leitzaldea irabazi asmorik gabeko elkarteak osatzen dute lan-talde hau. Mahai hau arduratzen da elikagaiak erosteaz, langileak kontratatzeaz, menuak diseinatzeaz eta ikastetxean bertan janaria prestatzeaz. Betelun, Udalaren eta guraso elkartearen artean egiten da kudeaketa.

Hainbat erosketa bi ikastetxeen artean egiten dira, eta nutrizionista bera dute. Erosketak herriko ekoizle, denda eta Ekoalderen bitartez egiten dira eta aldaketa nabarmena izan da. Betelu Araxes eskualde eskolan, esaterako,  bazkaltiar kopuruaren gorakada somatzen hasi dira.

Esperientzia hau ezagutzeko aukera egongo da Bergaran urtarrilaren 31an egingo dugun jardunaldian.

Info +

Leitza eta Araitz Beteluko eskola jantokiak (Argia)

https://www.navarra.es/eu/-/prentsa-oharra/hezkuntzak-leitza-betelu-eta-araizko-udalekin-sinatu-ditu-2025-2026-ikasturtetik-aurrera-eskola-jantokiak-kudeatzeko-aukera-emango-dieten-hitzarmenak

Hezkuntza Sailak sukalderik gabeko ikastetxe publikoak eraikitzeko duen politika lehengoratzea lortu dugun arren, catering makro-enpresek kudeatutako jantoki-eredua blindatuta dauka Hezkuntza sailak. Erantzunik gabe jarraitzen dute hainbat aldarrikapenek eta 2016ean abiatutako proiektu pilotuen ez daukate oraindik aterki juridikorik .

2019an Eusko Legebiltzarrak hartutako konpromiso politikoa oinarri hartuta, eskola-jantokien kudeaketa deszentralizatuari buruzko hausnarketa egingo dugu. Horretarako, gaian aditua den Aitor Bilbao abokatu bat izango dugu gurekin eta bi esperientzia ezagutuko ditugu: udal-kudeaketa Araitz-Betelun eta Urduñako esperientzia.

Informazio praktikoa

• Eguna eta ordua: urtarrilaren 31ean 10,00etatik 13,30etara.
• Lekua: Bergarako udaleko pleno aretoa (San Martin plaza)
• Garraio publikoz etortzeko (ibargarai geltokia): https://gipuzkoa.avanzagrupo.com/eu/lineas-y-horarios/horarios
• Autoz etortzeko: Aparkalekuak
• Izen ematea:  https://labur.eus/gpgau31
• Hizkuntza: euskara (xuxurlariak izango ditugu)
• Harremanetarako: info@gureplateragureaukera.eus / 623 433 348

Plataforma Denon Eskola Guraso Elkarteen Federazioaren eta hainbat eskola-komunitateren parte-hartzearekin sortu da eta bertako kideek modu koordinatuan lan egiten dute tokiko produktuak, elikadura hezkuntza eta ikastetxeen autonomia lehenetsiko dituen eskola-elikadura eredu bat aldarrikatzeko.

“Gure seme-alabak erdigunean jarriko dituen eredu bat nahi dugu, kalitatezko janaria eta lurraldean errotuta egotea bermatuko duena, eta langile nahikoak eta orientazio pedagogikoa izango dituen zaintza-zerbitzu bat, Hezkuntza Legeak agintzen duen bezala”, adierazi du Aitorrek, Ramón Bajo HLHIko ordezkari eta plataformako komunikazio-taldeko kideak.

Helburuak eta lan-ildo garrantzitsuenen artea honakoak daude:

• Eskola publikoetako jantokietan sukaldeen eredu propio bateranzko aldaketa sustatzea. Eguerdiko hezkuntza-proiektua hobetzea, elikadura ikaskuntzaren zati gisa txertatuz.
• Sistema bidezkoagoa, iraunkorragoa eta komunitarioagoa sustatzea, administrazioekin eta familiekin lankidetzan.
• Jantoki-zerbitzuaren egungo kudeaketaren jarraipen gardena ziurtatzea.

Benetako aldaketa baterantz

Plataforma horren sorrera bat dator egungo jantoki-zerbitzuaren kontratua laster amaitzearekin (2026ko ekaina), eta horrek aukera ematen du eredua berriz  pentsatzeko. “Gasteizko Eskolen Sukaldeak” plataformak gogorarazi du Eusko Legebiltzarrak aho batez onartu zuela akordio bat 2019ko urrian. Akordio horretan zera adostu zen, Eusko Jaurlaritzari “sukaldeak eraiki ditzala hala eskatzen duten ikastetxeetan, ikastetxe horiek erabaki dezaten zer jantoki-zerbitzu mota izan nahi duten” eta konpromiso hori gauzatzeko eskatzen da orain.

Horretaz gain, plataformak azaroaren 27rako eskola bakoitzean elkarretaratze bat egiteko deialdia zabaldu du. Familia guztiak aldarrikapen bateratua izango dute egun  berean eskola guztietarako: “Jantoki eredu honi EZ: gertuko sukaldeak eta ratioak jaitsi“.

Plataformak animatzen ditu hezkuntza-komunitate, guraso-elkarte eta ikastetxe publikoetako familia guztiak ekimenarekin bat egitera, ideiak ekartzera eta hurrengo ekintza eta mobilizazioetan parte hartzera. Horretako  Gasteizko.Eskolen.Sukaldeak@gmail.com helbidea sortu dute.

Gure platera, gure aukera ekimenetik, EHIGErekin batera, aspaldi jarri genuen martxan gure eskola eta institutuetan in situ sukaldeak eskatzeko kanpaina, gure eskola eta institutuetan sukaldeak egiteko kanpaina. Hemen daukazu informazio guztia.

Eskolak bi hamarkada baino gehiago daramatza catering menuen mende, eta eskolako guraso-elkarteak gogorarazi du Hezkuntza Sailak sukalde bat eraikitzea onartu zuela eta 2019-2023 Azpiegitura Planean jasota dagoela, baina hainbat arrazoirengatik proiektua atzeratu egin dela.

Gainera, adierazi dute IPIren (Haur, Lehen eta Bigarren Hezkuntzako zentroa) proiektu berriak itxaropen handiagoa dakarren arren, ez dagoela inolako bermerik sukaldearen proiektua aurrera eramateko.
Familiek oraindik ere menu osasungarriagoak eta hurbilagoak eskatzen dituzte, tokiko merkataritza bultzatzea eta jangela eskolako proiektu pedagogikoan integratzea. Hori, zalantzarik gabe, errazagoa da ikastetxeak in situ sukaldea badu, elikadura osasungarriagoa, hurbilagoa eta hezitzaileagoa bermatzen duelako.

PRENTSA OHARRA

1. Batetik, 2019-2023 azpiegitura-planean aurreikusita zeuden zazpi sukaldeetatik, hiru egin gabe daude oraindik, eta beste batzuk oraindik ezin izan dira erabiltzen hasi. Ez da bermatu ere sukaldariak langile publikoak izatea, catering enpresetakoak baizik.
2. Eraiki diren lau sukalde horietan ez da eredua aldatu (catering enpresek kudeatzen dituzte), nahiz eta horietako bitan (Atxondo eta Zaldibar) proiektu osagarria landu eta aurkeztu den. Azpiegitura berriak eraikitzeak haurren osasuna eta lan-baldintza egokiak bermatu beharko lituzke eta ez catering enpresen interesak.
3. Gutxienez 50 ikastetxek egin dute in-situ sukaldea eraikitzeko eskaera, ondorioz, horietatik gehienak plan honetatik kanpo geratuko lirateke
4. Ikastetxeetan sukaldea izatearen eragina positiboa den arren, eskola-jantokien eraldaketaren muina ez dago soilik sukaldeen eraikitzean. Catering enpresarik gabe jardun nahi duten eskolentzako bestelako eredu bat arautzea adostu zuten Eusko Legebiltzarrean, 2019an. Eredu berri horren inguruko araudia ateratzea Eusko Jaurlaritzari dagokio, baina ez da iristen, eta bitartean, catering enpresetatik at jardun nahi duten ikastetxeek zain jarraitzen dute.

Pasa den abenduan iragarri genuen bezala, politikoki eta administratiboki hainbat aukera galdu dira eskola-komunitateen eskaerak integratu ahal izateko: plegu, hezkuntza legea eta eskola-jantokiei buruzko agindu berrietan… egin diren azken aldaketa guztietan, catering-enpresa handien zerbitzua blindatu du Jaurlaritzak.

Arlo instituzionalean zein komunitarioan, jantokien eredua aldatzeko proposamen zehatzak egin ditugu eta posible dela erakusten duten proiektu pilotuen esperientziak ere hor ditugu. Etengabe jasotzen ditugu eskola-jantokien kudeaketa eredua aldatzeko eskaerak eta planteamendu landuak. Berriki, Hernaniko udalerrian adibidez, hezkuntza komunitate guztiak eta udalbatza osoak babestutako proiektu bat aurkeztu da, udal-konpetentzian oinarritutako jantoki eredu bat martxan jartzea oinarri duelarik. Beste lurralde batzuetan ezagutu izan dugun bezala, aldaketa hau posible da eta borondate politiko kontua da.

Hau guztiagatik, zera eskatzen diogu Hezkuntza sailari: behingoz abiatu dezala eredu deszentralizatu/osagarri berria eraikitzeko prozesua, inplikatutako eragile guztiekin. Honekin batera, ikastetxe, udal zein eskualde mailan egin diren proposamen ezberdinei erantzutea eskatzen diogu.

Hori dela-eta, zuen ikastetxeetan sukaldea izateko eskaera egitera animatzen zaituztegu “Ikastetxerik ez, sukalderik gabe” kanpainaren baitan.

Hemen aurkituko dituzue jarraitu beharreko urratsak.

Ikusi sukaldeen mapa sukaldeen egoera ezagutzeko gure ikastetxeetan.

Ikastetxerik ez, sukalderik gabe!

Baina, zer eta nola jaten dugun hobetu nahi badugu, inplikatu behar gara. Kezkatzen zaitu menuen kalitateak? Zure jantokia hezitzaileagoa izatea nahi duzu? <a href=”https://www.ehige.eus/eu/jangela-batzordea/”>Jantoki-batzordea</a>rekin bat egin!

Jantokia gure seme-alaben hezkuntzaren funtsezko arlo bat da. Jantoki justuagoak, jasangarriagoak eta osasungarriagoak nahi ditugu. Gure seme-alabek giro lasai eta atsegin batean jan dezaten nahi dugu, ohitura onak ikasiz. Eta zu aldaketaren parte izan zaitezke!

Jantoki-batzordeko kide bazara, honako hauek egin ditzakezu: zerbitzua kontrolatu, hobekuntzak proposatu, kalitatezko produktuak eta produktu ekologikoak exijitu, sukaldea eskatu eta eskola-baratzea edo “hamaiketako osasungarriak” bezalako proiektuak bultzatu.

Gainera, jantokiko espazioa hobetu dezakezu. Haurren parte-hartzea sustatu eta lotura handiagoa sor dezakezu familien, jantokian lan egiten duten pertsonen eta elikagaiak ekoizten dituztenen artean.

Jantokia eskolako hezkuntza-proiektuaren parte da eta kalitatezko espazio atsegina eraiki dezakegu, jateko leku bat baino askoz gehiago baita jangela.

Bat egin jantoki-batzordearekin eta elkarrekin eraiki dezagun gure seme-alabentzat nahi dugun jangela!

<strong>Parte hartu eta erabaki!</strong>