Pasa den maiatzean, Isére departamentura (Frantzia) bidaiatu zuen euskal delegazio batek, horien artean EHIGE eta VSF-ko kideek, Administrazioak college-etako (11-15 urte) jantokiak nola kudeatzen dituen ezagutzera bertako eta produktu ekologikoekin.

2008tik egunero 20.000 menu ematen ditu, zazpi sukalde nagusietan sukaldatuta eta bertako (Departamentuan ekoiztutakoak) eta produktu ekologikoak gailenduz. Horretarako, bertako produktuei balioa ematen dieten lizitazioak prestatzen dituzte, betiere Europako araudia errespetatuz: jakien denborazkotasuna, hezkuntza-irizpideak (ekoizleek jarduera pedagogikoak egitea), ingurumenarekin lotutako irizpideak, eta abar.

Hiru ekoizle talderen produktuekin hornitzen diren zazpi sukalde nagusi ditu Departamentuak (berak kontratatzen ditu langileak):  ReColTer (Departamentuko Iparraldeko udalek sortutako ekimena 45 ekoizlerekin, batez ere fruta), Mangez Bio Isere (60 ekoizle ) eta Legumerie AB Epluche (barazkiak garbitu, moztu eta ontziratzen dituen enpresa).

Estatuko gobernuaren merkatu paraleloa sortu du Departamentuak, bertako ekoizleen produkzioa kontuan hartuz. Sukaldeko arduradunari dagokio non erosten den erabakitzea. Hori dela-eta, sentsibilizazio-lan garrantzitsua egiten du Departamentuak bertako produktuen inguruan. Sukaldariekin ere lan egiten du, elikadura-segurtasunaren inguruko gaiak landuz.

Ikastetxeetan ere egiten da sentsibilizazioa, produktu lokalak eta ekologikoak identifikatuz dagozkien zigiluekin: Isère edo/eta bio zigiluak. Ikasle bakoitzak 3,05 euro ordaintzen ditu menuko (self-service sistema erabiltzen da eta gainerako kostua 7,30 eurora arte menuko, Departamentuak ordaintzen du.

Bertako produktuak gailentzea debekatzen duen Europako araudia gainditzeko, 13 zatitan banatu dute lizitazioa. Europako araudiak uzten du zirkuitu motzak eta ingurumenarekin lotutako irizpideak puntuatzen. Horietaz gain, puntu gehiago jasotzen ditu jarduera pedagogikoak egiten dituen ekoizleak, bere ustiapena bisitatzea kasu (multinazionalek zailtasun handiagoak dituzte horrelako jarduerak egiteko).

10-12 asteko aurretik egiten dira eskariak, ekoizleek denbora izan dezaten planifikatzeko.